Хэрэглэгчээ дээдэлсэн дэвшилтэт технологид түшиглэсэн цахилгаан, дулааны эрчим хүчний үр ашигтай үйлдвэрлэл явуулах

Шанхай хотод Эрчим хүчний үзэсгэлэнд оролцоод ирлээ

China power 2014-14th China International exhibition-д Засвар хяналтын албаны инженерүүд оролцоод ирлээ. Уг үзэсгэлэн нь Шанхай хотын Пудон дүүргийн үзэсгэлэнгийн цогцолборт 2014 оны 04 дүгээр сарын 08-10-нд болж, Хятад, Герман, Польш, Казахстан, Япон, Солонгосын үйлдвэрлэгчид оролцов. Үзэсгэлэнд “Метал үйлдвэрлэл”, “Метал боловсруулалт–хяналт шалгалт хийх”, “Үйлдвэрлэлийн автоматжуулалт”, “Цахилгаан үүсгүүрийн үйлдвэрлэл”, “Салхины эрчим хүчний үйлдвэрлэл”, “Цахилгаан тоног төхөөрөмжийн үйлдвэрлэл”, “ХАБ-ын хамгаалах хэрэгслэл, гутал, хувцас” чиглэлүүдээр үйл ажиллагаа явуулдаг компаниуд бүтээгдэхүүнээ танилцуулж, сурталчилж оролцсон томоохон үзэсгэлэн байлаа. Үзэсгэлэнд оролцсон талаар 4 дүгээр сарын 23-нд болох засварын хэлэлцүүлгийн үеэр станцын ИТА нарт үзэсгэлэнгээс авчирсан материалыг нээлттэй үзэх, ашиглах болон танилцуулга хийнэ.

222

Эрчим хүчний салбарын удирдах ажилтны зөвлөгөөн боллоо

Эрчим хүчний яам, “Эрдэнэтийн дулааны цахилгаан станц” ТӨХК болон “Эрдэнэт булганы цахилгаан түгээх сүлжээ” ТӨХК-ууд хамтран эрчим хүчний салбарын “Удирдах Ажилтны Өргөтгөсөн Шуурхай Зөвлөгөөн”-ийг энэ сарын 12-13-ны хооронд Орхон аймагт зохион байгууллаа.  Зөвлөгөөний үеэр Эрчим хүчний зохицуулах хорооны ажлын албаны дарга Э.Самдан ЭХЗХ-ны 2013 оны үйл ажиллагааны тайлан, төсвийн гүйцэтгэлийг эрчим хүчний тусгай зөвшөөрөл эзэмшигч компаниудад тайлагнан сонирхсон асуултанд хариулж, үйл ажиллагааны тайлангийн эмхэтгэл болон статистик үзүүлэлтийн товхимолыг танилцуулж, гарын авлагаар хангав.

Орон тооны зохицуулагч шинээр томилогдов

Монгол улсын Ерөнхий сайдын 2014 оны 3-р сарын 26-ны өдрийн 33 дугаар захирамжаар өндөр насны тэтгэвэр авах эрх үүссэн, Эрчим хүчний зохицуулах хорооны орон тооны зохицуулагч Н.Мягмарсүрэнг чөлөөлөв. Мөн өдрийн Ерөнхий сайдын 34 дүгээр захирамжаар Равдангийн Мягмарыг Эрчим Хүчний Зохицуулах Хорооны орон тооны зохицуулагчаар 2014 оны 4-р сарын 1-ний өдрөөс эхлэн 6 жилийн хугацаатай томилов. Равдангийн Мягмар нь Монгол улсын зөвлөх инженер бөгөөд 2006-2011 оны хооронд Эрчим хүчний зохицуулах хорооны (хуучнаар Эрчим хүчний Зохицуулах газар) орон тооны зохицуулагчийн үүрэгт ажлыг хашиж байсан юм.

Эрчим хүчний салбарын 2013 оны дүнгийн хурал боллоо

Эрчим хүчний зохицуулах хорооны ээлжит хурал 2014 оны 3-р сарын 25-27-ны хооронд болж эрчим хүчний салбарын 2013 оны нэгдсэн дүн болон тусгай зөвшөөрөл эзэмшигч томоохон компаниудын дүнг хэлэлцэв. Хуралд эрчим хүчний тусгай зөвшөөрөл эзэмшигч компаниудын гүйцэтгэх захирал, Төлөөлөн удирдах зөвлөлийн дарга, гишүүд,  Эрчим хүчний яамны бодлогын хэрэгжилтийг зохицуулах газрын дарга Ц.Баярбаатар нар оролцов.

8888

ЭХЗХ-ноос  эрчим хүчний салбарын 2013 оны үйл ажиллагааны нэгдсэн дүн, санхүү-эдийн засгийн байдал болон тусгай зөвшөөрөл эзэмшигч компани тус бүрийн техникийн үзүүлэлтүүд, эдийн засгийн чадавх, найдвартай ажиллагаа, ашиг алдагдалд хийсэн шинжилгээ зэргийг танилцуулав. Мөн ЭХЗХ-ноос тусгай зөвшөөрөл эзэмшигч компаниудын үйл ажиллагаанд хийсэн шинжилгээ, компаниудын үйл ажиллагааны гол үзүүлэлтүүд болох ашиг, алдагдал, цахилгаан дулааны эрчим хүчний өр, авлагыг буурууласан байдал, борлуулалтын орлого төвлөрүүлэлтийн хувь, үр ашиг, найдвартай ажиллагаа, үйл ажиллагааны доголдол, саатал, хэрэглэгчээс ирсэн санал, гомдол мөн Эрчим хүчний зохицуулах хорооноос өгсөн үүрэг даалгаврын биелэлт зэргийг харгалзан  тусгай зөвшөөрөл эзэмшигч томоохон 18 компанийн 2013 оны рейтингийг дараах байдлаар тогтоов.

Эрчим Хүчний Зохицуулах хорооноос тусгай зөвшөөрөл эзэмшигч компаниудын өнгөрсөн оны үзүүлэлт, рейтинг зэргийг харгалзан цаашид авч хэрэгжүүлэх арга хэмжээ, анхаарах асуудлын  талаар зөвлөмж, үүрэг даалгаврыг өгөхөөр тогтов.

Цахилгааны төлбөр тооцоогоо интернэтээр, ТҮЦ машинаар төлөх боломжтой

Цахилгааны үлдэгдэл шалгах, төлбөр тооцоогоо хийх зэрэг бүх үйлчилгээ онлайн болж байгаа аж. Энэ талаар УБЦТС ТӨХК-ийн олон нийттэй харилцах мэргэжилтэн Д.Цэнгэлмаагаас Монголын мэдээ сонины сэтгүүлч тодруулжээ.

777777

-Иргэд цахилгааны төлбөрийн үлдэгдлээ мэдэхийн тулд заавал хэрэглэгчдэд үйлчлэх төвд очих шаардлагагүй болсон гэсэн энэ талаар тодруулаач?

-Манай компани шинэ дэвшилтэт техник технологийг үйл ажиллагаандаа аль болох түргэн хугацаанд нэвтрүүлэх, хэрэглэгчдэд үйлчилгээгээ хүргэхдээ хэрэгцээ шаардлагатай нь нийцүүлж хөгжүүлэх бодлогыг барьж байгаа. Тухайлбал, өнгөрсөн онд бид цахилгаан эрчим хүчний мэдээлэл лавлагааны 70047004 дугаарын утастай дуудлагын төвийг байгуулан хэрэглэгчидтэйгээ шууд харилцаж, тэдний хүссэн мэдээллийг өгч, санал хүсэлтийг нь шийдвэрлэдэг болсон. Энэ утасны цаана мэдээллийг мэргэжлийн төвшинд өгөх чадвартай цахилгааны инженерүүд ажиллаж байгаа. Харин энэ онд бид хэрэглэгчиддээ “Цахилгаан хэрэглэгч онлайн систем”-ээр бэлэг барьж байна. Энэхүү онлайн систем рүү нэвтэрснээр хэрэглэгч өдөр, шөнө хэдийд ч цахилгааны төлбөрөө төлж, төлбөрийн дэлгэрэнгүй мэдээлэл авах, гэрээгээ шинэчлэх, сунгах, тоолуурын бичилтийг хянах, заалтаа илгээж болно. Түүнчлэн өөрт хэрэгтэй зөвлөмжүүдийг унших боломжтой. Үүний тулд онлайн систем рүү http://my.tog.mn хаягаар орно.

-Онлайн систем нь хэрэглэгчид ашиглахад хэр ойлгомжтой вэ?

-Энэхүү системийн хувьд хэрэглэхэд тун энгийн, хялбар байгаа. Хэрэглэгч системийг хэрхэн ашиглах талаар бид видео зааварчилгаа бэлтгэсэн. Хэрэглэгч хүсвэл манай компанийн вэб сайт болох www.tog.mn-ээс үзэх боломжтой. Өнөөдрийн байдлаар тухайн хэрэглэгч төлбөр тооцоогоо гэрээнд заасан хугацаандаа онлайнаар, ТҮЦ машинаар, банкинд цахимаар болон бэлнээр, Хэрэглэгчдэд үйлчлэх төв, салбар кассуудад очиж тушаах зэргээс аль боломжтойгоо сонгох бүрэн боломжтой болсон.

-Утсаар мэдээлэл авсан тохиолдолд утасны тариф өндөр гэсэн ойлголт иргэдийн дунд байгаа. Үнийн тариф нь яг хэд вэ?

-Утасны төлбөрийн асуудал дээр хэрэглэгчдийн дунд ташаа ойлголт яваад байх шиг байна. Манай компанийн 70047004 дугаарын утас арилжааны зорилготой биш учраас хэрэглэгчийн утаснаас энгийн тарифаар л төлбөр унана. Тодруулбал, 70047004 дугаарын утас руу залгахад минут тутамд цахилгаан холбоо компанийн дугаараас 0 төгрөг, төрийн холбооны 26, төмөр замын 24, 25, нисэхийн 28-тай дугааруудаас 25 төгрөг, Мобикомын дугаараас 75 төгрөг, Юнителийн дугаараас 35-70 төгрөг, Жи-Мобайлын дугаараас 30-50 төгрөг зарцуулна. Дуудлагын төвийн утсыг ажиллуулахын гол зорилго нь бид хэрэглэгчтэй түргэн хугацаанд амьд холбоог үүсгэж, хүссэн үйлчилгээг нь шуурхай үзүүлэхэд оршиж байгаа. Ер нь утсаар шууд харилцах үйлчилгээ цахилгаан хэрэглэгчдэд их таашаагдаж байгаа. Бид энэ үйлчилгээг өнгөрсөн оны гуравдугаар сараас нэвтрүүлсэн. Гэтэл оны эцэст хандсан хэрэглэгчийн тоо 550 мянга давсан байсан. Хэдийгээр цахилгаан эрчим хүчний хангамжийн асуудал эх үүсвэрийн дутагдалтай байгаа ч үйлчилгээний шатанд хөгжиж байгаа.

 

-Хэрэглэгчид мессэжээр мэдээлэл авсан тохиолдолд хэдэн төгрөг төлөх вэ?

-Хэрэглэгч гар утаснаасаа 137004 дугаар руу хэрэглэгчийн кодоо бичиж илгээгээд, төлбөрийн үлдэгдэл шалгахад тухайн үүрэн операторын мессэж үйлчилгээний тарифаар л нэгж унаж байгаа.

-Иргэд гар утсаараа утсаар цахилгааны тооцоо хэрхэн хийх талаар тодруулаач?

-Цахилгаан хэрэглэгч онлайн системийг гар утасны апплекэйшн болгох ажлын явц дуусах шатандаа явж байна. Тун удахгүй хэрэглэгчид гар утаснаасаа энэ системийг ашиглах болно.

-Танай дуудлагын төв хэдээс хэдэн цагийн хооронд ажилладаг вэ?

-Цагийн хуваарийг бид өнгөрсөн оны сүүлээс эхлэн уян хатан болгосон. Дуудлагын төвийн 70047004 утас ажлын өдөр өглөө 08.00-22.00, бямба гарагт 10.00-20.00 цаг хүртэл ажиллаад үлдсэн цагуудад Түгээх төвүүдийн ээлжийн инженерүүдэд шилжиж байгаа. Тэгэхээр бүх цагуудад энэ утас ажиллаж байгаа гэж ойлгож болно. Хэрэглэгчдийн ая тухтай байдлыг хангах зорилгоор хэрэглэгчдэд үйлчлэх төвүүдийнхээ ажлын өдрүүдийн цагийг сунгаж 08.00-21.00 цаг хүртэл болгосон. Тэгэхээр цахилгаан хэрэглэгчид өглөө ажил эхлэхээс өмнө, ажил тараад цахилгаан эрчим хүчтэй холбоотой асуудлаа шийдэх боломжтой гэсэн үг.

-Цахилгаан хэрэглэгчид санал гомдлоо танай байгууллагад хэрхэн хүргэх вэ?

-Дуудлагын төвийн 70047004 дугаарын утаснаас гадна бид сошиал медиа ашигладаг хэрэглэгчидтэйгээ фэйсбүүкэд www.facebook/ubedn, твиттерийн @ubedn1 гэсэн хаягуудаар харилцдаг. Хандалт бүр манайд бүртгэгдэж, тайлангаа гаргадаг учраас аль ч сувгаар хэрэглэгч хандаж болно. Хэрэглэгчийн хувьд кодоо мэддэг байхад л хангалттай.

Visit Us On TwitterVisit Us On FacebookVisit Us On Google PlusVisit Us On PinterestVisit Us On YoutubeVisit Us On LinkedinCheck Our Feed